Evento terminado

Entradas para ICC Week 2018 - Inauguración – Mundos deseñados

ICC Week 2018 - Inauguración – Mundos deseñados

Información adicional

ICC Week 2018 - Inauguración – Mundos deseñados

  • 02 may 2018
  • Centro Cultural “Marcos Valcárcel”, Ourense mostrar mapa
Información del evento

Invitación válida hasta agotar aforo

18h00 - 20h00 | Javier Mariscal, Maria Grande, Paco Clavel, Juan Sánchez, Bárbara Ouka Leele e José Manuel Baltar: "Mundos deseñados"

 

Javier Mariscal 

Nado en Valencia en 1950, a vida deste barcelonés de adopción é unha historia de amor co debuxo. Na cidade condal esperta á contracultura e dá renda solta á súa etapa de debuxante de cómics underground. En 1979 crea o logo Bar Cel Ona, que lle daría gran popularidade. Ao ano seguinte deseña o bar Dúplex de Valencia en colaboración con Fernando Salas. Para este local proxecta unha das súas máis famosas pezas: o taburete dúplex, unha auténtica icona dos anos 80. Participa como deseñador de mobles na exposición Memphis, an International Style de Milán. En 1987 expón na Documenta de Kassel e no Centro Georges Pompidou de París. Tamén desenvolve varias coleccións de téxtil para Marieta e Tráfico de Modas e expón na sala Vinçon de Barcelona. Finalmente, en 1989 o seu personaxe Cobi é elixido como mascota dos Xogos Olímpicos de Barcelona de 1992. A partir de entón crea o seu Estudio Mariscal e comeza a recibir grandes encargos nos que desprega o seu particular universo, rebosante de historietas, caricaturas, caligrafías cheas de humor, liñas distorsionadas e trazos primixenios que buscan romper os límites. Mariscal mergúllase en todos os medios e atrévese con calquera disciplina artística ao seu alcance: grafista, paisaxista, pintor, escultor, ilustrador, animador, deseñador de mobiliario, interiorista… sen traizoar a súa identidade de debuxante. En 1999 recibe o Premio Nacional de Deseño. Exhíbense retrospectivas da súa obra no London Design Museum e en Corea, e as súas ilustracións acaparan portadas e páxinas en The New Yorker, El País ou na xaponesa Apo. Nos últimos anos, Javier Mariscal saíuse novamente do plano para aventurarse no cinema de animación con Chico & Rita, xunto a Fernando Trueba, con quen gaña un Premio Goya e con quen actualmente está a colaborar nun novo proxecto. 
 

 

Maria Grande

Tras graduarse como Técnico Superior en Gráfica Publicitaria en Ourense, a súa cidade natal, cursa a diplomatura de Deseño Dixital no Istituto Europeo di Design (IED) de Madrid. Comeza a traballar nunha produtora audiovisual como animadora pero meses despois volve á escola como titora en Artes Visuais para máis tarde traballar no departamento Media Lab do IED ata se converter na responsable da imaxe audiovisual da empresa. Sempre combinou o seu traballo con diversos proxectos de deseño como freelance tanto en cartelería, como en imaxe corporativa, deseño de discos, videoclips, etc. A gran protagonista dos seus deseños é a ilustración. Gústalle reducir ao máximo os conceptos para expresar ideas coa mínima cantidade de recursos. O seu estilo aposta polos trazos simples, polas cores planas e pola utilización de ferramentas dixitais rudimentarias como o Paint.
 

Paco Clavel

O innato axitador cultural Paco Clavel ten organizado ao longo da súa carreira exposicións, concertos e eventos de diversa índole, nos que sempre brillaron con luz propia a súa particular estética e o seu sentido do humor. Ademais, a singular personalidade deste artista, tan querida polo pú- blico español, ten servido de inspiración a músicos, pintores, fotógrafos, deseñadores de moda e cineastas. Nos anos 80, xunto con Luís del Campo, forma o grupo Bob Destiny & Clavel y Jazmín, que desenvolve o estilo musical chamado “guarripop” ou “cutreLux”, caracterizado por unha estética rechamante impulsada pola súa inimitable personalidade. Co grupo ou en solitario, Paco realiza infinidade de aparicións en televisión e actuacións en directo por todo o territorio español. No estranxeiro destaca a súa actuación no Baile de la Rosa, organizado pola familia real de Mónaco, que en 2008 estivo dedicado á Movida Madrileña. A súa actividade radiofónica está especialmente vinculada a Radio Nacional de España, onde participou en programas como El Guirigay ou Extravaganza. A isto hai que engadir o seu traballo como DJ en numerosos eventos como o World Pride Madrid 2017, o espazo Matadero-Madrid ou o festival de música Sonorama.


Juan Sánchez

Ao longo da súa carreira desenvolveu o seu traballo como documentalista en medios audiovisuais e programas como Queridos Cómicos e Otras Miradas, ou nas cintas ¿Quién fue Pilar Miró? (2011), Elio Berhanyer, maestro del diseño (2013), Con la pata quebrada (2013) e Manda huevos (2016). Ademais, tamén dirixiu o documental Moda y cine para o Museo del Traje de Madrid, traballou cos selos discográficos Quartet Records e Lemuria Music na edición de diversos discos de música cinematográfica, realizou varias colaboracións para as publicacións do Festival Internacional de Cinema de San Sebastián e escribiu artigos sobre cinema para as revistas Exhumed Movies, Candy Magazine e Simply ademais de editar os libros Varietés (2015), con Rafael Doctor, e Antoloxía Party (2017), con Valeria Vegas. Entre 1995 e 2012 colaborou co compositor Bernardo Bonezzi e desde 1993 realizou distintos proxectos xunto ao deseñador gráfico e fotógrafo Juan Gatti. Desde 2013 colabora con Paco Clavel en diversas exposicións centradas na música popular española. 


Bárbara Ouka Leele

Nada en Madrid, en 1957, de nena impresiónanlle tanto as cores da natureza no bosque de San Rafael como as pinceladas de El Greco. Estudou fotografía en Photocentro, onde a mediados dos 70 estaban a fraguarse as tendencias artísticas en cernes. Froito da súa dobre paixón pola fotografía e a pintura nace o seu estilo personalísimo, que se plasmou en abundantes colaboracións de escenografía, fotografía, cartelería e deseño de vestiario nos campos do teatro, a danza, a ópera e o cinema. Na súa traxectoria atesoura numerosos premios, entre eles o Premio Nacional de Fotografía (2005). Creadora polifacética, tamén se aventurou no mundo da escultura en vidro e na dramaturxia, e publicou varios libros de poesía e a obra en prosa Axis mundi e outros relatos. Viviu en Barcelona, Madrid, Nova York, México e París e as súas experiencias vitais e a súa procura das orixes reflíctense na súa obra. Participou nun gran nú- mero de exposicións en distintos lugares do mundo, coas que alcanzou unha gran repercusión. En 2008 foi distinguida coa Medalla de Honor na XI Bienal Internacional do Cairo e en 2010, unha creación súa foi seleccionada na Bienal de Shangai para a sección de gran formato. Así mesmo, a súa obra ten sido obxecto de monográficos audiovisuais como La mirada de Ouka Leele, nomeada á mellor longametraxe documental nos Premios Goya de 2010. Ela mesma púxose tras as cámaras para rodar o curto Pour quoi? sobre o relato de Caddy Adzuba. Tamén foi retratada por Miquel Barceló. Desde 2014 é xurado das artes no Premio Princesa de Asturias.


Manuel Baltar Blanco

Presidente da Deputación de Ourense, será o presentador do encontro. Graduouse en Dereito pola Universidade de Santiago de Compostela en 1990 e é funcionario do corpo superior da administración da Xunta de Galicia e xefe do servizo xurídico da Xunta de Galicia en Ourense. Inspirado por programas de desenvolvemento de países industrializados, acuñou o termo "provincia intelixente" e aposta por políticas innovadoras que leven a Ourense  a desenvolver o seu potencial, a creatividade, o uso de ferramentas e competencias TIC, sen traizoar esa esencia rural e natural que fai de Ourense unha provincia única e singular.
 
Na actualidade é tamén vicepresidente de Partenalia, representante dos territorios termais europeos EHTTA, participou como relator na South Summit 2015 e representou a Ourense como único territorio europeo convidado como exemplo de territorio innovador e xestión, no Seminario Internacional 'Governança Metropolitana' que se desenvolve na cidade brasileira de Curitiba.

 

Lugar: Ourense | C.C. Marcos Valcárcel

 

También podría interesarte...